ҚҰҚЫҚТЫҚ МӘДЕНИЕТТІ ҚАЛЫПТАСТЫРУ

Халықтың құқықтық сауаттылығын арттыру мақсатында ұйымдастырылған іс-шара Ата Заңды талқылауға бағытталды. «Дөңгелек үстелдің» модераторы болған М. Қозыбаев аттындағы СҚМУ-дің құқықтану кафедрасының доценті, заң ғылымының кандидаты Гүлбахша Мұсабаева Конституцияның қабылдану тарихына қысқаша тоқталып, 1993 және 1995 жылғы қабылданған Ата Заңдардағы өзгерістерді атап айтты. Халықтың тең жартысы өз құқықтарын толықтай білмейтіндігіне баса назар аударған ол осындай іс-шаралар құқықтық сауаттылықты жетілдіруде үлкен рөл атқаратындығын да тілге тиек етті.
«Дөңгелек үстел» барысында әр саланың мамандары әртүрлі тақырыпты қамтыған хабарламалар жасады. Бірінші болып сөз алған облыстық соттың судясы, заң ғылымының кандидаты Инесса Қуанова «Сот билігі – азаматтардың конституциялық құқығын қорғау құралы» тақырыбына тоқталды. Ол үстіміздегі жылдың ақпан айында азаматтық іс жүргізу кодексіне енгізілген өзгерістерге қатысты түсініктеме берді. Аралық сот пен жаңадан енгізілген медиаторлардың екі жаққа да тиімді шешім қабылдаудағы маңызының ерекшелігін де атап көрсетті. Облыстық балалар құқығын қорғау департаментінің адамгершілік және рухани даму бөлімінің бастығы Ольга Черепанова отбасылық қарым-қатынас, ата-аналар мен балалар құқықтары, қоғамдағы балалар рөлін насихаттауда атқарылып жатқан ісшараларды атап көрсетті.
«Әр қазақстандық сапалы медициналық еөмек алуға құқылы», - деген саламатты өмір салтын қалыптастыру орталығының директоры Лариса Беляева облыстағы денсаулық сақтау саласының негізгі көрсеткіштерінің жақсарып жатқандығы. Үкімет тарапынан қолға алынған бағдарламалар мен тұрғындардың өз денсаулықтарына деген жауапкершіліктерінің артуының көрінісі екендігін атап айтты.
«Дөңгелек үстелге» қатысқан қалалық мәслихат депутаттары, қалалық мектептердің мұғалімдері, қоғамдық бірлестіктердің өкілдері, еңбек ардагерлері мен жастар өздерін қызықтырған мәселелер жөнінде сұрақтар қойды. Сондай-ақ «Даму мен гүлденудің негізі» атты кітап көрмесі ұйымдастырвлды. Іс-шара соңында «дөңгелек үстелді» ұйымдастырушылар баяндамашыларға алғыс хаттар табыс етті.

Бақытжан ЖОЛДАСҚЫЗЫ

  ЖОЛДАСҚЫЗЫ Б. Құқықтық мәдениетті қалыптастыру // Солтүстік Қазақстан. - 2012. - 30 тамыз. - Б.4